បើយើងគិតចាប់ពីឆ្នាំ 2005 ដែលជាពេលកម្មវិធីផែនទី Google Maps បានបើកដំណើរការលើកដំបូង រហូតមកដល់ឆ្នាំ 2020 នេះ គឺវាបានឈានចូលអាយុ 15 ឆ្នាំហើយ ដោយបានធ្វើឲ្យជីវិតយើងកាន់តែងាយស្រួល ថែមមួយកម្រិតទៀត តាមរយៈការប្រាប់ផ្លូវ និងទីតាំងនានាផងដែរ។ ដើម្បីជាការប្រារព្ធពិធីគម្រប់ខួបលើកទី 15 នេះ ក្រុមការងាររបស់ Google ក៏បានធ្វើការផ្លាស់ប្ដូរជូននូវស្លាកសញ្ហា ឬ រូបតំណាងថ្មីទៅឲ្យកម្មវិធី Maps របស់ខ្លួន និងបានអាប់ដេតផ្ទៃកម្មវិធីមួយចំនួន ថែមទៀតផង។
ប្រិយមិត្តអ្នកអានភាគច្រើន ប្រាកដជាតែងតែប្រើប្រាស់វាជានិច្ចជាកាល និងបានដឹងរួចមកហើយថា Google Maps មានផ្ទុកទិន្នន័យពីផ្លូវទាំងអស់ នៅជុំវិញពិភពលោកតែម្ដង ជាពិសេសកាន់តែលម្អិត គឺស្ថិតនៅក្នុងប្រទេស ជឿនលឿនជាដើម ព្រោះវាជួយអាចក្នុងការបង្ហាញផ្លូវ ឬ ផែនទីនៃទីតាំងណាមួយ ដែលយើងចង់ទៅបាន នៅពេលដែលយើងដូចជាស្រពិចស្រពិល ឬ មិនទាន់ស្គាល់ច្បាស់នៅឡើយ។ លើសពីនេះទៅទៀត យើងក៏ធ្លាប់ឮពីព័ត៍មានចុះផ្សាយថា Google Maps អាចជួយរកមនុស្សដែលបានបាត់ខ្លួន ឬ វត្ថុអ្វីមួយដែលរកមិនឃើញជាយូរឆ្នាំ តាមរយៈឧបករណ៍ផ្កាយរណប ពីមុនមកដូចគ្នា។
ចំណែកឯកំណែអាប់ដេតចុងក្រោយនេះ នឹងផ្ដល់ជូនលោកអ្នកនូវរូបរាងថ្មី ឬក៏អាចនិយាយបានម្យ៉ាងទៀតថា Logo ថ្មីប្លែកពីជំនាន់មុនច្រើន ជាមួយនឹងរូបតំណាងឲ្យសញ្ញាម្ជុល (Pin) ចាក់លាយពណ៌ដោយ ពណ៌ក្រហម, ពណ៌ខៀវ, ពណ៌លឿង និងពណ៌បៃតង ព្រមទាំងមានលាយពណ៌ស នៅផ្ទៃខាងក្រោយរបស់វា។ បើនៅខាងក្នុងកម្មវិធីផែនទីតែម្ដងនោះ ក៏មានការផ្លាស់ប្ដូរថ្មីដូចគ្នាដែរ ដោយឆាប់ៗខាងមុខនេះ វានឹងមានចំណុចផ្ទាំងចំនួន 5 នៅខាងក្រោម រួមមានដូចជាផ្ទាំងដើម Explore, ផ្ទាំង Commute, ផ្ទាំង Saved, ផ្ទាំង Contribute និងផ្ទាំង Updates ចុងក្រោយគេ។
ទាំងអស់នេះជាចំណុចផ្លាស់ប្ដូរត្រួសៗប៉ុណ្ណោះ ដោយត្រូវបានគេរំពឹងទុកថា Google នឹងបន្ថែមមុខងារថ្មិៗមួយចំនួនទៀតទៅឲ្យ Maps បន្ដបន្ទាប់ទៀតនៅពេលខាងមុខនេះ។ អញ្ចឹង ប្រិយមិត្តអ្នកអានទាំងអស់គ្នា អាចចូលទៅកាន់កន្លែង Update នៅលើ App Store ឬ Play Store លើឧបករណ៍ឆ្លាតវៃរបស់លោកអ្នក ដើម្បីទទួលយកកំណែអាប់ដេតថ្មី នៃកម្មវិធីផែនទី Google Maps នេះបានហើយ។
Episode Lainnya
